പാലക്കാട്: ജില്ലയിൽ തെരുവുനായ ആക്രമണം രൂക്ഷമാകുന്നു.* ഒറ്റപ്പാലം നഗരത്തിലും തൃത്താല കപ്പൂരിലും നിരവധി പേർക്ക് തെരുവുനായ്ക്കളുടെ കടിയേറ്റു. ഒരു ദിവസത്തിനിടെ തന്നെ 8 ഓളം പേർക്കാണ് ജില്ലയുടെ വിവിധ ഭാഗങ്ങളിൽ നായയുടെ കടിയേറ്റത്. ഇത് നാട്ടുകാരിൽ വലിയ ഭീതി പടർത്തിയിരിക്കുകയാണ്.
*ഒറ്റപ്പാലത്ത് ഡെലിവറി ജീവനക്കാരന് കടിയേറ്റു*
ഒറ്റപ്പാലം നഗരത്തിലാണ് ആദ്യ സംഭവം. മായന്നൂർ കൊണ്ടാഴി സ്വദേശിയായ 35 കാരൻ സജിത്തിനാണ് തെരുവുനായയുടെ കടിയേറ്റത്. ചൊവ്വാഴ്ച ഉച്ചയോടെ നഗരത്തിലെ കമലാലയം റോഡിൽ വെച്ചായിരുന്നു സംഭവം.
ഫ്ലിപ്കാർട്ടിൽ ഓർഡർ ചെയ്ത ഉൽപ്പന്നം ഉപഭോക്താവിന് കൈമാറാൻ എത്തിയതായിരുന്നു സജിത്ത്. ഓർഡർ നൽകാൻ വീട്ടിലേക്ക് കയറുന്നതിനിടെ തെരുവുനായ പിന്നിൽ നിന്ന് ആക്രമിക്കുകയായിരുന്നു. ഇടതുകാലിൽ ആഴത്തിലുള്ള മൂന്ന് മുറിവുകളുണ്ട്. ഉടൻ തന്നെ യുവാവ് ഒറ്റപ്പാലം താലൂക്ക് ആശുപത്രിയിൽ ചികിത്സ തേടി.
ഒറ്റപ്പാലത്തും സമീപ പ്രദേശങ്ങളിലുമായി ചൊവ്വാഴ്ച മാത്രം നാലോളം പേർക്ക് തെരുവുനായയുടെ കടിയേറ്റിട്ടുണ്ട്. ഇവർ ഒറ്റപ്പാലം താലൂക്ക് ആശുപത്രിയിലും കണ്ണിയംപുറത്തെ സ്വകാര്യ ആശുപത്രിയിലുമായി ചികിത്സ തേടി.
*തൃത്താല കപ്പൂരിൽ 10 വയസുകാരനും ആക്രമണത്തിനിരയായി*
മറുവശത്ത്, തൃത്താല കപ്പൂരിൽ ജനങ്ങൾ തെരുവുനായ ഭീതിയിലാണ്. കഴിഞ്ഞ ദിവസം കപ്പൂരിൽ പത്ത് വയസ്സുകാരനടക്കം നാല് പേരെയാണ് തെരുവുനായ്ക്കൾ ആക്രമിച്ചത്. കപ്പൂർ പാറക്കൽ പള്ളിക്ക് സമീപം സ്കൂളിലേക്ക് പോവുകയായിരുന്ന കുട്ടിയെയാണ് നായ ആക്രമിച്ചത്.
പ്രദേശത്ത് ഒരു മാസത്തിനിടെ 8 പേർക്കാണ് ഇതിനോടകം തെരുവുനായ്ക്കളുടെ ആക്രമണം ഉണ്ടായത്. പരിക്കേറ്റവരെ തൃശൂർ മെഡിക്കൽ കോളേജ് ആശുപത്രിയിലേക്ക് മാറ്റി. കഴിഞ്ഞ കുറേ മാസങ്ങളായി തൃത്താലയുടെ വിവിധ ഭാഗങ്ങളിൽ തെരുവുനായ ശല്യം രൂക്ഷമാണെന്ന് നാട്ടുകാർ പറയുന്നു.
*നടപടി വേണമെന്ന് നാട്ടുകാർ*
തുടർച്ചയായി തെരുവുനായ ആക്രമണം ഉണ്ടായിട്ടും അധികൃതർ നടപടി എടുക്കുന്നില്ലെന്ന് നാട്ടുകാർ ആരോപിക്കുന്നു. നായകളെ പിടികൂടി വാക്സിനേഷൻ നൽകാനും, ആക്രമണകാരികളായ നായകളെ മാറ്റാനും നഗരസഭ അടിയന്തരമായി ഇടപെടണമെന്നാണ് ജനങ്ങളുടെ ആവശ്യം.
