പാലക്കാട് ആലത്തൂരിൽ എക്സൈസിന്റെ വൻ മയക്കുമരുന്ന് വേട്ട. 56.5 ഗ്രാം മെത്താംഫിറ്റമിനുമായി മലപ്പുറം സ്വദേശിയെ ആലത്തൂർ എക്സൈസ് അറസ്റ്റ് ചെയ്തു.
ഓപ്പറേഷൻ തണ്ടറിന്റെ ഭാഗമായി ആലത്തൂർ എക്സൈസ് സർക്കിൾ ഇൻസ്പെക്ടർ സമീറും പാർട്ടിയും ചേർന്ന് നടത്തിയ പരിശോധനയിലാണ് യുവാവ് പിടിയിലായത്. വടക്കേഞ്ചേരി ചന്തപ്പുര വെച്ച് നടത്തിയ പരിശോധനയിലാണ് 56.5 ഗ്രാം മെത്താംഫിറ്റമിൻ കണ്ടെടുത്തത്.
വിൽപ്പനയ്ക്കായി ബൊലേറോ ജീപ്പിലും ശരീരത്തിലുമായി കടത്തിക്കൊണ്ടുവന്ന മലപ്പുറം തിരൂരങ്ങാടി വെള്ളിമൂക്ക് പടിക്കൽ സ്വദേശി 35 കാരൻ അനസിനെയാണ് അറസ്റ്റ് ചെയ്തത്. ഇയാൾ ദീർഘനാളായി മയക്കുമരുന്ന് കടത്ത് നടത്തിവരികയായിരുന്നുവെന്നാണ് എക്സൈസിന് ലഭിച്ച വിവരം.
എക്സൈസിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. വടക്കേഞ്ചേരി ഭാഗത്ത് മയക്കുമരുന്ന് എത്തുന്നുണ്ടെന്ന വിവരത്തെ തുടർന്ന് എക്സൈസ് സംഘം മേഖലയിൽ നിരീക്ഷണം ശക്തമാക്കിയിരുന്നു. തുടർന്ന് ചന്തപ്പുരയിൽ വാഹന പരിശോധന നടത്തുന്നതിനിടെയാണ് ബൊലേറോ ജീപ്പിൽ എത്തിയ അനസിനെ പിടികൂടിയത്. ജീപ്പിൽ നിന്നും ഇയാളുടെ ശരീരത്തിൽ നിന്നുമായി മയക്കുമരുന്ന് കണ്ടെത്തുകയായിരുന്നു.
മെത്താംഫിറ്റമിൻ അതീവ ലഹരിയുള്ള സിന്തറ്റിക് മയക്കുമരുന്നാണ്. ചെറിയ അളവിൽ പോലും വലിയ ലഹരി നൽകുന്ന ഈ മയക്കുമരുന്ന് യുവാക്കൾക്കിടയിൽ വൻതോതിൽ പ്രചരിക്കുന്നുണ്ട്. പിടിച്ചെടുത്ത മയക്കുമരുന്നിന് ലക്ഷങ്ങൾ വിലവരുമെന്ന് എക്സൈസ് അധികൃതർ അറിയിച്ചു.
പരിശോധനാ സംഘത്തിൽ അസിസ്റ്റന്റ് എക്സൈസ് ഇൻസ്പെക്ടർ ഗ്രേഡ് ശിവപ്രസാദ് പി.ടി, പ്രിവന്റീവ് ഓഫീസർ ഗ്രേഡ് ബാബു വി.എസ്, സിവിൽ എക്സൈസ് ഓഫീസർമാരായ ഷിനോജ് കെ, അനൂപ് കെ, ഡ്രൈവർ മുജീബ് റഹ്മാൻ എന്നിവർ പങ്കെടുത്തു.
പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ഇയാൾക്ക് മയക്കുമരുന്ന് എത്തിച്ചുനൽകിയവരെ കുറിച്ചും വിൽപ്പന നടത്തിയിരുന്നവരെ കുറിച്ചും എക്സൈസ് വിശദമായ അന്വേഷണം ആരംഭിച്ചിട്ടുണ്ട്. ഓപ്പറേഷൻ തണ്ടറിന്റെ ഭാഗമായി ജില്ലയിൽ പരിശോധനകൾ കൂടുതൽ ശക്തമാക്കുമെന്ന് എക്സൈസ് അറിയിച്ചു.
