അട്ടപ്പാടിയിലെ ഉന്നതികളിലും അങ്കണവാടികളിലും കുടിവെള്ള ലഭ്യത, അവ ശുദ്ധീകരിക്കുന്നതിനുള്ള സംവിധാനം എന്നിവ ഉറപ്പാക്കണമെന്ന് ഭക്ഷ്യസുരക്ഷ കമ്മീഷൻ. തിളപ്പിച്ചാറ്റിയ വെള്ളം കുട്ടികൾക്ക് നൽകണമെന്നും കമ്മീഷൻ നിർദ്ദേശിച്ചു. മൂലഗംഗൽ ഉന്നതിയും അംഗനവാടിയും സന്ദർശിച്ച ശേഷമാണ് കമ്മീഷൻ അംഗം മുരുകേഷ് ചെറുനാലി നിർദേശം നൽകിയത്.
മൂലഗംഗൽ ഉന്നതിയിൽ സഞ്ചരിക്കുന്ന റേഷൻകട ആരംഭിക്കുന്നത് സംബന്ധിച്ച് കമ്മീഷണറേറ്റിലേക്ക് പ്രൊപ്പോസൽ നൽകിയിട്ടുണ്ട്.
സമീപത്തെ വെച്ചപതി,
വെള്ളകുളം, ഗോഞ്ചിയൂർ എന്നീ ഉന്നതികളിലെ റേഷന് ഗുണഭോക്താക്കളോട്
പദ്ധതികളുടെ ആനുകൂല്യലഭ്യത ഉറപ്പുവരുത്തിയെന്നും അദ്ദേഹം അറിയിച്ചു.
അംഗനവാടികളിലെ പോഷകാഹാരങ്ങളുടെ സ്റ്റോക്കുകൾ പരിശോധിച്ച കമ്മീഷൻ അംഗം അരി, ധാന്യങ്ങൾ, റാഗി, ശർക്കര, അവിൽ, തുടങ്ങിയ ഭക്ഷ്യവസ്തുക്കൾ സമയബന്ധിതമായി വിതരണം ചെയ്യാൻ നിർദ്ദേശിച്ചു.
അട്ടപ്പാടി ഗവ. ട്രൈബൽ സ്കൂളിൽ ഉച്ചഭക്ഷണ പദ്ധതിയിൽ മെനു പ്രകാരം കൃത്യമായി ഭക്ഷണം നൽകിവരുന്നതായി അംഗം വിലയിരുത്തി. വിദ്യാർത്ഥികൾക്ക് ഉച്ചഭക്ഷണം കഴിക്കുന്നതിനുള്ള ഡൈനിങ് ഹാൾ സജ്ജമാക്കാൻ ജില്ലാ പഞ്ചായത്തിന് കത്ത് നൽകാനും അദ്ദേഹം നിർദ്ദേശിച്ചു.
ജില്ലാ സപ്ലൈ ഓഫീസർ എ എസ് ബീന, താലൂക്ക് സപ്ലൈ ഓഫീസർമാരായ വി മനോജ്, സി പത്മിനി, എൽ എ തഹസീൽദാർ ജയചന്ദ്രൻ തുടങ്ങിയവർ പങ്കെടുത്തു
