നവീകരണ പ്രവൃത്തികൾ നടന്നുവരുന്ന ചാലിശ്ശേരി-പട്ടാമ്പി റോഡിൽ ചാലിശ്ശേരി മുതൽ കൂറ്റനാട് വരെയുള്ള ഭാഗം നവംബർ 15നുള്ളിൽ ടാറിംഗ് നടത്തണമെന്ന് പൊതുമരാമത്ത് വകുപ്പ് മന്ത്രി പി.കെ.ബഷീർ നിർദ്ദേശം നൽകി. മന്ത്രി വിളിച്ചുചേർത്ത ഉന്നതതല യോഗത്തിലാണ് നിർദേശം നൽകിയത്. കൂറ്റനാട് മുതൽ പട്ടാമ്പി വരെയുള്ള ഭാഗം ഡിസംബർ അവസാനത്തോടെ ടാറിംഗ് നടത്തും.
വി.ടി.ബൽറാം എംഎൽഎയുടെ അഭ്യർത്ഥന അനുസരിച്ച് ഇന്നലെ തിരുവനന്തപുരത്ത് നിയമസഭാ മന്ദിരത്തിൽ മന്ത്രി വിളിച്ചുചേർത്ത ഉന്നതതല യോഗത്തിൽ വച്ചാണ് ഈ തീരുമാനം എടുത്തത്.
ചാലിശ്ശേരി – പട്ടാമ്പി റോഡ് തൃത്താല മണ്ഡലത്തിലെ ഏറ്റവും തിരക്കേറിയ പ്രധാന റോഡുകളിൽ ഒന്നാണ്. നാളുകളായി റോഡിന്റെ ശോചനീയാവസ്ഥ മൂലം യാത്രക്കാർ ഏറെ ദുരിതത്തിലായിരുന്നു. മണ്ഡലത്തിലെ പ്രധാന റോഡുകളുടെ നവീകരണം വേഗത്തിലാക്കണമെന്ന് ആവശ്യപ്പെട്ട് വി.ടി.ബൽറാം എംഎൽഎ ആണ് മന്ത്രിയെ സമീപിച്ചത്.
യോഗത്തിൽ റോഡിന്റെ നിലവിലെ സ്ഥിതി വിശദമായി വിലയിരുത്തി. ചാലിശ്ശേരി മുതൽ കൂറ്റനാട് വരെയുള്ള ഭാഗത്ത് മണ്ണ് നിറയ്ക്കലും മറ്റു പ്രാഥമിക പ്രവൃത്തികളും ഏറെക്കുറെ പൂർത്തിയായിട്ടുണ്ട്. അതുകൊണ്ടുതന്നെ ഈ ഭാഗം നവംബർ 15നുള്ളിൽ ടാറിംഗ് നടത്തി ഗതാഗതയോഗ്യമാക്കാൻ കഴിയുമെന്ന് ഉദ്യോഗസ്ഥർ യോഗത്തിൽ അറിയിച്ചു. ഇതിന്റെ അടിസ്ഥാനത്തിലാണ് മന്ത്രി നിർദ്ദേശം നൽകിയത്.
കൂറ്റനാട് മുതൽ പട്ടാമ്പി വരെയുള്ള ഭാഗത്ത് കൾവർട്ടുകളും ഡ്രൈയ്‌നേജുകളും നിർമ്മിക്കുന്ന പ്രവൃത്തി പുരോഗമിക്കുകയാണ്. ഈ പ്രവൃത്തികൾക്ക് തടസ്സമായി നിൽക്കുന്ന മരങ്ങൾ രണ്ടാഴ്ചക്കകം മുറിച്ചു നീക്കാനും യോഗത്തിൽ തീരുമാനമായി. മരം മുറിച്ചു നീക്കിയാൽ ഈ ഭാഗത്തെ പ്രവൃത്തിയും വേഗത്തിൽ പൂർത്തിയാക്കാൻ കഴിയും. അതുകൊണ്ടുതന്നെ കൂറ്റനാട് മുതൽ പട്ടാമ്പി വരെയുള്ള ഭാഗം ഡിസംബർ അവസാനത്തോടെ ടാറിംഗ് നടത്താൻ കഴിയുമെന്നും യോഗം വിലയിരുത്തി.
തൃത്താല നിയോജക മണ്ഡലത്തിലെ മറ്റ് പ്രധാന റോഡ് പ്രവൃത്തികളും യോഗം വിലയിരുത്തി. നിലവിൽ പ്രവൃത്തി നടന്നുവരുന്ന എഴുമങ്ങാട്-കറുകപുത്തൂർ അടക്കമുള്ള റോഡുകളിൽ നിർമ്മാണം ത്വരിതപ്പെടുത്താൻ യോഗം തീരുമാനിച്ചു. ബജറ്റിൽ പ്രഖ്യാപിച്ചിരിക്കുന്ന പ്രവൃത്തികൾക്ക് എത്രയും വേഗം ഭരണാനുമതി നൽകാനും എംഎൽഎ നിർദ്ദേശിച്ച പുതിയ പ്രവൃത്തികൾക്ക് എസ്‌റ്റിമേറ്റ് തയ്യാറാക്കാനും മന്ത്രി പി.കെ.ബഷീർ നിർദ്ദേശം നൽകി.
വി.ടി.ബൽറാം എംഎൽഎയും പിഡബ്ല്യുഡി ഉന്നത ഉദ്യോഗസ്ഥരും യോഗത്തിൽ പങ്കെടുത്തു. തൃത്താല മണ്ഡലത്തിൽ പുതിയ വമ്പൻ പദ്ധതികൾക്ക് ഉടൻ സർക്കാർ തലത്തിൽ അംഗീകാരം ലഭിക്കുമെന്നും വിശദാംശങ്ങൾ പൊതുമരാമത്ത് വകുപ്പ് മന്ത്രി തന്നെ പ്രഖ്യാപിക്കുമെന്നും എംഎൽഎ അറിയിച്ചു. റോഡ് നവീകരണം പൂർത്തിയാകുന്നതോടെ ചാലിശ്ശേരി, കൂറ്റനാട്, പട്ടാമ്പി മേഖലകളിലെ യാത്രാക്ലേശത്തിന് വലിയ പരിഹാരമാകും എന്നാണ് പ്രതീക്ഷ.