കാൽനടയാത്രക്കാരനെ ബൈക്കിടിച്ച് തെറിപ്പിച്ചതിന് പിന്നാലെ പിന്നിൽ നിന്ന് അമിത വേഗതയിൽ വന്ന കാറിന്റെ ചക്രങ്ങൾ ശരീരത്തിലൂടെ കയറിയിറങ്ങി വയോധികന് ദാരുണാന്ത്യം. ആറങ്ങോട്ടുകര തലശ്ശേരിയിലാണ് നാടിനെ നടുക്കിയ അപകടം.
തലശ്ശേരി യത്തീംഖാന പരിസരത്ത് താമസിക്കുന്ന കോന്തത്തുഞാലിൽ വീട്ടിൽ 70 വയസ്സുകാരനായ കൃഷ്ണൻകുട്ടിയാണ് മരിച്ചത്. ഞായറാഴ്ച രാത്രി 7.45 ഓടെയായിരുന്നു അപകടം.
തലശ്ശേരി സെന്ററിനും യത്തീംഖാന സ്റ്റോപ്പിനും ഇടയിൽ റോഡിന്റെ സൈഡിലൂടെ നടന്നു പോകുകയായിരുന്നു കൃഷ്ണൻകുട്ടി. ഈ സമയം പിന്നിൽ നിന്ന് വന്ന ബൈക്ക് യാത്രികർ അദ്ദേഹത്തെ ഇടിച്ചു തെറിപ്പിക്കുകയായിരുന്നു. റോഡിലേക്ക് തെറിച്ചുവീണ കൃഷ്ണൻകുട്ടിയുടെ കാലിലൂടെ തൊട്ടുപിന്നാലെ അമിത വേഗതയിൽ വന്ന കാർ കയറിയിറങ്ങുകയായിരുന്നുവെന്നാണ് ദൃക്സാക്ഷികൾ പറയുന്നത്.
അപകടത്തിന്റെ ഞെട്ടിക്കുന്ന സിസിടിവി ദൃശ്യങ്ങളും പുറത്തുവന്നിട്ടുണ്ട്. ദൃശ്യങ്ങളിൽ റോഡരികിലൂടെ നടന്നു പോകുന്ന വയോധികനെ ബൈക്ക് ഇടിച്ചു തെറിപ്പിക്കുന്നതും, തൊട്ടുപിന്നാലെ വരുന്ന കാർ നിർത്താതെ കയറിയിറങ്ങുന്നതും വ്യക്തമായി കാണാം.
അപകടത്തെ തുടർന്ന് നാട്ടുകാർ ഓടിക്കൂടുന്നത് കണ്ടതോടെ ബൈക്ക് യാത്രികരും കാർ യാത്രക്കാരും വാഹനവുമായി സംഭവസ്ഥലത്തു നിന്ന് രക്ഷപ്പെട്ടുവെന്നും ആരോപണമുണ്ട്. മനുഷ്യത്വരഹിതമായ നടപടിക്കെതിരെ നാട്ടുകാർ പ്രതിഷേധം ഉയർത്തിയിട്ടുണ്ട്.
ഗുരുതരമായി പരിക്കേറ്റ കൃഷ്ണൻകുട്ടിയെ ഉടൻ തന്നെ നാട്ടുകാർ ചേർന്ന് തൃശൂർ ഗവ. മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
കൂറ്റനാട് ഭാഗത്തു നിന്നും ചെറുതുരുത്തി ഭാഗത്തേക്ക് പോവുകയായിരുന്ന കാറാണ് അപകടത്തിൽപ്പെട്ടത്. ചെറുതുരുത്തി പോലീസ് സംഭവസ്ഥലത്തെത്തി മേൽനടപടികൾ സ്വീകരിച്ചു. സിസിടിവി ദൃശ്യങ്ങൾ കേന്ദ്രീകരിച്ച് ബൈക്കിനും കാറിനും വേണ്ടിയുള്ള അന്വേഷണം ഊർജിതമാക്കിയതായി പോലീസ് അറിയിച്ചു.
റോഡരികിലൂടെ നടന്നു പോയ നിരപരാധിയായ വയോധികന്റെ ജീവൻ അമിത വേഗതയും അശ്രദ്ധയും കാരണം പൊലിഞ്ഞത് പ്രദേശത്ത് വലിയ ദുഃഖത്തിനും പ്രതിഷേധത്തിനും ഇടയാക്കിയിട്ടുണ്ട്. തലശ്ശേരി സെന്റർ – യത്തീംഖാന റോഡിൽ അമിത വേഗത നിയന്ത്രിക്കാൻ നടപടി വേണമെന്നാണ് നാട്ടുകാരുടെ ആവശ്യം.
